кіруюць ці працуюць у прыватных кампаніях у галіне медыцынскага і традыцыйнага турызму, вэб-распрацоўкі, графічнага дызайну, фатаграфіі, міжнароднага і касмічнага права, банкаўскіх паслуг, лагістыкі ды інш.
працуюць журналістамі, рэдактарамі і блогерамі ў беларускіх і замежных СМІ, напрыклад, на тэлеканале «Белсат», DELFI, LRT, Citydog ды інш.
стварылі сайты для паведамлення пра парушэнні падчас выбарчых кампаній на анлайн-мапе (electby.org).
Асацыяцыя выпускнікоў ЕГУ дае пажыццёвае членства ўсім тым, хто навучаўся ў нашым універсітэце. Падтрымліваючы кантакты, выпускнікі рэгулярна атрымліваюць інфармацыю пра кар’ерныя магчымасці, вакансіі, адукацыйныя праграмы, гранты, кар’ерныя семінары, якія праводзяцца ў віленскім навучальным корпусе, а таксама ўдзельнічаюць у сетцы, што злучае працадаўцаў з таленавітымі выпускнікамі.
Новым крокам у гэтым кірунку стала стварэнне праграмы ментарства, у межах якой выпускнікі ЕГУ дзеляцца сваім досведам з цяперашнімі студэнтамі універсітэта.
Усе нашы выпускнікі запрашаюцца на штогадовыя сустрэчы выпускнікоў. Пачынаючы з 2012 г. ужо адбыўся шэраг сустрэч у Мінску і Вільні. Каб атрымаць інфармацыю пра наступныя мерапрыемствы, сачыце за абнаўленнямі ў суполцы на Facebook.
Ствары клуб выпускнікоў
Заклікаем нашых выпускнікоў засноўваць мясцовыя клубы выпускнікоў ЕГУ, што аб’ядноўваюць выпускнікоў-насельнікаў аднаго горада ці рэгіёна альбо тых, хто мае падобныя зацікаўленні. Клубы выпускнікоў могуць прапаноўваць уласныя праекты і падаваць заяўкі на фінансаванне ЕГУ. Дзейсныя клубы існуюць у Вільні, Віцебску, Мінску і Нью-Ёрку. Ахвотных далучыцца да клуба выпускнікоў ЕГУ ці заснаваць новы клуб просім звяртацца на адрас: alumni@ehu.lt.
Стыпендыя выпускнікоў
Стыпендыя выпускнікоў ЕГУ была заснаваная з мэтай падтрымкі актыўных студэнтаў бакалаўрскіх праграм і ўмацавання сувязяў паміж студэнтамі і выпускнікамі ЕГУ. Стыпендыя заахвочвае сацыяльную актыўнасць і можа быць прысуджаная студэнту, які прадэманстраваў выдатныя акадэмічныя дасягненні і займаецца іншымі відамі грамадскай дзейнасці.
Выпускнікі могуць скласці ахвяраванні ў фонд гэтай стыпендыі падчас вечароў сустрэчы выпускнікоў ЕГУ ці ў любы іншы час у ЕГУ (вул. Таўра, 12, Вільня).
Крытэрыі адбору
Конкурс на атрыманне Стыпендыі выпускнікоў ЕГУ зазвычай абвяшчаецца ўвосень. Прэтэндэнты на атрыманне стыпендыі павінныя даслаць наступныя дакументы на alumni@ehu.lt:
Пацверджанне акадэмічных дасягненняў ад акадэмічнага дэпартамента ЕГУ, засведчанае подпісам Дэкана Бакалаўрскай школы, якое павінна ўтрымліваць акадэмічны рэйтынг і спіс акадэмічных дасягненняў (атрыманыя гранты, медалі, прэміі, стыпендыі, месцы, занятыя ў конкурсах, дыпломы, граматы, сертыфікаты ўдзелу). Прэтэндэнты таксама далучаюць копіі наяўных у іх дыпломаў і сертыфікатаў.
Пералік сацыяльнай актыўнасці (пацверджаны рэкамендацыяй супрацоўнікаў Студэнцкай службы, Рады Студэнцкага прадстаўніцтва).
Рэкамендацыя ад кіраўніка дэпартамента, дзе навучаецца прэтэндэнт.
Рэкамендацыя прынамсі ад аднаго выпускніка ЕГУ, які ахвяраваў сродкі ў фонд гэтай стыпендыі.
Працэдура адбору
Стыпендыя прысуджаецца на падставе конкурсу ў межах сродкаў фонду Стыпендыі выпускнікоў ЕГУ.
Заяўкі разглядае Камісія па размеркаванні Стыпендыі выпускнікоў ЕГУ ў складзе Дэкана Бакалаўрскай школы, трох выпускнікоў, што ахвяравалі сродкі ў стыпендыяльны фонд, прадстаўнікоў Студэнцкай службы і Студэнцкага прадстаўніцтва. Адпаведныя крытэрам заяўкі затым выносяцца на ўсеагульнае галасаванне выпускнікоў, што ахвяравалі сродкі ў стыпендыяльны фонд. Стыпендыя прысуджаецца прэтэндэнту, які набраў большасць галасоў.
Выпускнік бакалаўрскай праграмы «Сусветная палітыка і эканоміка» 2019 года Мікалай Дзядок. Мікалай – грамадска-палітычны дзеяч, блогер, журналіст, які актыўна і сумленна выказвае сваю грамадзянскую пазіцыю. Палітычны вязень.
Скончыў юрыдычны каледж БДУ, пасля чаго быў залічаны на трэці курс юрыдычнага факультэта БДУ. Універсітэт пакінуў з прычыны таго, што форму і метады навучання палічыў для сябе непрымальнымі. Паступіў на завочную форму навучання ў ЕГУ на праграму «Паліталогія і еўрапейскія даследаванні».
У верасні 2010 года быў незаконна арыштаваны і прысуджаны да пазбаўлення волі нібыта за хуліганства, якога не здзяйсняў. Быў прызнаны палітычным вязнем. Пад націскам ЕС і сусветнай грамадскасці быў вызвалены 22 жніўня 2015 года разам з іншымі палітычнымі вязнямі.
Вярнуўся да навучання ў ЕГУ на сумесную праграму з універсітэтам Вітаўта Вялікага ў Коўне «Сусветная палітыка і эканоміка». Пасля завяршэння навучання для падрыхтоўкі да паступлення ў магістратуру ў Польшчы з’ехаў на моўныя курсы ва ўніверсітэт Любліна. У сувязі з пандэміяй і пераходам на дыстанцыйнае навучанне вярнуўся ў Беларусь. 11 лістапада 2020 года быў арыштаваны.
Уладальнік прэміі ім. Алеся Караля 2017 года ў намінацыі «Лепшы сацыяльна-палітычны матэрыял» за артыкул «Дармаедскія пратэсты і перспектыва Майдана» у газеце «Новы Час» і аднайменнай прэміі 2018 года ў намінацыі «Лепшы сацыяльна-палітычны артыкул» за артыкул «Турма і воля: культурны абмен». У 2017 годзе атрымаў прэмію ім. Францішка Аляхновіча за лепшы твор, напісаны ў няволі (кніга «Колеры паралельнага свету»).
Выпускніца бакалаўрскай праграмы «Медыя і візуальны дызайн» 2015 года і магістарскай праграмы «Культурныя даследаванні» 2017 года.
Ксенія — аўтар прыгодніцкай трылогіі «Адваротны бок люстра» (2012; 2016) і рамана «Губернскі дэтэктыў. Справа аб крывавых дукатах» (2017). З 2018 года знаходзіцца ў Саюзе беларускіх пісьменнікаў. Ксенія працуе і як дызайнер кнігі — яна афармляе як свае праекты, так і праекты іншых аўтараў. Афармленне трылогіі «Адваротны бок люстра» і яго промапрадукцыі, якое стала бакалаўрскім дыпломным праектам Ксеніі, увайшло ў пяцёрку фіналістаў міжнароднага конкурсу «Дызайн-Дэбют» ў 2015 годзе. У 2017 годзе кніга Міхала Бараноўскага «Volumen.1», дызайн якой распрацавала Ксенія, стала лаўрэатам Літаратурнай прэміі «Дэбют» імя Максіма Багдановіча.
Ксенія напісала навуковую манаграфію пра дызайн беларускіх грошай «Грошы і ідэалогія: [R] эвалюцыя беларускасці даўжынёй у 100 год» (2018), заснаваную на магістарскім даследаванні і выпушчаную ў рамках серыі маладых даследчыкаў ЕГУ «Opus Primum». Прэзентацыя манаграфіі прайшла ў Музеі Грошай пры Банку Літвы ў Вільнюсе і ў Літаратурным музеі Максіма Багдановіча ў Мінску ў 2018 годзе. Манаграфія таксама была прадстаўлена на пленарным пасяджэнні IX Міжнароднай нумізматычнай канферэнцыі, прысвечанай 25-годдзю беларускага рубля, у Нацыянальным банку Рэспублікі Беларусь у 2019 годзе.
З 2017 года Ксенія вядзе аўтарскі практыкум па эсэ ў Цэнтры «Прапілеі» для абітурыентаў ЕГУ ў Мінску. А ў 2019 годзе сумесна з Віктарам Марціновічам правяла Майстэрню крэатыўнага пісьма III Летняй школы ЕГУ ў Вільні. Вынікам стаў выпуск зборніка «12», у які ўвайшлі лепшыя тэксты ўдзельнікаў майстэрні. Прэзентаваны быў у Літаратурным музеі Максіма Багдановіча ў Мінску ў студзені 2020 года.
Зараз Ксенія з’яўляецца студэнткай дактарантуры ЕГУ па напрамку «Філасофія» і асістэнтам Дэпартамента гуманітарных навук і мастацтваў ЕГУ.
Выпускнік бакалаўрскай праграмы «Медыя і камунікацыя» 2010 года. У 2009 годзе скончыў першыя сумесныя курсы прыкладной журналістыкі BBC і ЕГУ, прыняў удзел у стажыроўцы ў Лондане разам з 8 лепшымі студэнтамі. Працаваў уласным карэспандэнтам Белсат у Вільні, на Еўрапейскім радыё для Беларусі, рэпарцёрам і вядучым на Літоўскім радыё і тэлебачанні. Выкладаў у ЕГУ курс практычных навыкаў журналіста. Стаяў ля вытокаў Медыя-хаба ЕГУ і з’яўляўся рэдактарам універсітэцкай радыёстанцыі, выпускі якой на працягу больш, чым за паўтары гады выходзілі ў эфіры Еўрапейскага радыё для Беларусі. З 2012 года па 2016 год працаваў на швейцарскай кампаніі Gustav Kaeser Training International трэнерам па міжасобасных бізнес-камунікацыях, узначальваў Балтыйскае і Беларускае бюро.
У 2012 годзе заснаваў праект «МазгаБойня», паб-квіз, які сёння распаўсюдзіўся на 15 краін і 240 гарадоў свету і з’яўляецца самым буйным як па колькасці гульцоў, так і па колькасці гарадоў, якія прымаюць удзел у гульнях.
Выпускнік бакалаўрскай праграмы «Міжнароднае права» 2013 г. Юрысконсульт інвестыцыйнага фонду Haxus (праекты MSQRD, Maps.me, Fabby, Flo і іншыя). Выкладчык дысцыплін «Права інтэлектуальнай уласнасці», «Супрацьдзеянне карупцыі» і «Асновы права» ў Інстытуце бізнесу і менеджменту тэхналогій Беларускага дзяржаўнага універсітэта. Аўтар шматлікіх публікацый у галіне юрыспрудэнцыі ў беларускіх СМІ і юрыдычных выданнях. Стыпендыят праграмы Фулбрайт 2015 года (Чыкагская школа права Джона Маршала).
Раней працаваў юрыстам у міжнароднай юрыдычнай фірме COBALT, юрыдычным кансультантам у стартап-інкубатары Serendipity Innovations (Стакгольм, Швецыя). Стажыраваўся ў міжнароднай арганізацыі FINCA International (Вашынгтон, ЗША).
Выпускніца бакалаўрскай праграмы «Міжнароднае права» 2010 г. С 2011 г. Марына з’яўляецца дырэктаркай найстарэйшай экалагічнай грамадскай арганізацыі ў Беларусі «Экадом» і каардынатаркай прававой службы «Зялёная сетка».
Прафесійная дзейнасць Марыны – гэта ахова прыроды, абарона правоў грамадзян на бяспечнае навакольнае асяроддзе і прасоўванне інтарэсаў мясцовых супольнасцяў у прыняцці экалагічна значных рашэнняў. Выратаванне сквера Катоўка, падтрымка ўдзельнікаў акцыі «Крытычная маса» (па выніках іх затрымання і пераследу), грамадская экалагічная экспертыза шматлікіх прамысловых аб’ектаў, у тым ліку ўдасканаленне Генеральнага плана Мінска, удзел у паляпшэнні беларускага прыродаахоўнага заканадаўства, кансультацыі грамадзян, якія сутыкнуліся з той ці іншай экалагічнай праблемай, арганізацыя семінараў і трэнінгаў па ўдзелу грамадскасці ў прыняцці экалагічна значных рашэнняў і распрацоўка асветніцкіх друкаваных матэрыялаў па гэтай тэме і інш. – вось спіс праектаў, ініцыятарам якіх была Марына.
Выпускнік бакалаўрскай праграмы «Культурная спадчына і турызм» 2011 г. Пасля навучання ў ЕГУ Ягор атрымаў стыпендыю Маскоўскай вышэйшай школы сацыяльных і эканамічных навук для навучання на магістарскай праграме «Мэнэджмент у галіне культуры». Пасля магістратуры Ягор вярнуўся ў Беларусь, дзе сваімі сродкамі і намаганнямі ініцыяваў праграму культурнага адраджэння беларускай правінцыі. Так паўсталі сумесныя культурныя праекты ў Міры, Нясвіжы, Любчы, самым паспяховым з якіх можна лічыць Mirum Music Festival – першы прыватны музычны фестываль Беларусі, які штогод праходзіць у мястэчку Мір. Штогод колькасць наведвальнікаў фестывалю расце.
У Любчы Ягор быў валанцёрам і дапамагаў аднаўляць замак. Ён таксама з’яўляецца намеснікам дырэктара па развіцці гасцінічна-рэстараннага комплексу ў Нясвіжскім палацы.
Выпускнік бакалаўрскай праграмы «Культурная спадчына і турызм» 2009 г. Зміцер атрымаў дыплом з адзнакай і ўвесь час падтрымлівае сувязь з альма-матэр. Ён быў арганізатарам шэрагу сустрэч выпускнікоў ЕГУ ў краінах, дзе ён працаваў. Зараз Зміцер працуе кіраўніком па праектах у сферы гасціннасці ў кампаніі Airbnb ў Дубліне (Ірландыя).
Пасля навучання ў ЕГУ Дзмітрый выйграў 2 стыпендыі: магістарскую стыпендыю імя Эдмунда Маскі (Edmund S. Muskie Graduate Fellowship) і стыпендыю Урада Швейцарыі. Атрымаў ступень магістра з адзнакай (Magna Cum Laude) ва Універсітэце італьянскай Швейцарыі (Università della Svizzera italiana, USI).
Зміцер вывучаў міжнародны турызм на факультэце эканомікі і камунікацый. На працягу 2-х месяцаў праходзіў стажыроўку ў Канадзе ў нацыянальным парку Gwaii Haanas National Park, які ўнесены ў спіс прыроднай спадчыны ЮНЕСКА. Працуючы ў Airbnb ў Маскве, Зміцер быў адказным за развіццё кампаніі ў СНД і Балтыі. У 2014 г. прадстаўляе Airbnb на канферэнцыях у Мінску, арганізаваных Міністэрствам спорту і турызму і Беларускай асацыяцыяй агра- і экатурызма. Дзякуючы намаганням Зміцера Airbnb стаў спонсарам найбуйнейшага маладзёжнага фестывалю Беларусі – Summer Freaky Party.
Выпускнік бакалаўрскай праграмы «Культурная спадчына і турызм» (2010 г.) і магістарскай праграмы «Ахова і інтэрпрэтацыя культурнай спадчыны» (2012 г.).
Заснавальнік і кіраўнік беларускіх кампаній у галіне медыцынскага турызму Med Travel Belarus і ELITE MED. Уладзіслаў – вядучы эксперт Беларусі ў галіне медыцынскага турызму і экспарту медыцынскіх паслуг.
Уладзіслаў уваходзіў у склад працоўнай групы даследавання на тэму «Імпарт лепшых замежных практык у галіне медыцынскага турызму», вынікі якога выклікалі шырокі грамадскі інтарэс і прыцягнулі ўвагу Міністэрства аховы здароўя Беларусі. Уладзіслаў жыве і працуе ў Мінску.
Выпускніца магістарскай праграмы «Візуальныя і культурныя даследванні» 2012 г.
Лепшая студэнтка бакалаўрскай праграмы «Масавыя камунікацыі і журналістыка» 2010 г. І лепшая студэнтка Магістарскай школы выпуска 2012 г.
Аляксандра Ігнатовіч – фемінісцкая фільммэйкерка, культурная актывістка, мэнэджэрка адукацыйных і сацыяльных праектаў. У 2008-2010 г. Аляксандра працавала карэспандэнтам на тэлеканале Белсат, у 2009-2010 г. ініцыявала сацыяльна-мастацкі праект для дзяцей з інваліднасцю «Дзіцячыя сны» (Беларусь), у 2011 г. – была куратаркай адукацыйна-даследчага праекта «Літоўскае/савецкае кіно: Рэканструкцыя» (Літва), у 2011-2014 г. – ўзначальвала сацыяльна-адукацыйны праект ЕГУ LitPro. Аляксандра – заснавальніца і куратарка Беларуска-літоўскага фестывалю малабюджэтнага кіно toKino. У 2011- 2012 г. яна з’яўлялася т’ютаркай праекта «Развіццё гендэрнай адчувальнасці ў Беларусі» і куратаркай фемісцкага кінапраекта «Сукенка» (Беларусь), а ў 2014-2015 была валанцёркай арганізацыі па кінаадукацыі і кінавытворчасці Luksuz produkcija (Славенія), дырэктаркай праграмы кінафестывалю Luksuz festival poceni filma. У 2015 г. яна стала саарганізатаркай фестывалю квір-кіно і анімацыі Meta (Беларусь). З 2016 г. Аляксандра з’яўляецца куратаркай кінапраграмы мастацка-адукацыйнага фестывалю Artes Liberales (Беларусь) і Лабараторыі фемісцкага (і) квір-кіно Makeout.
