Д-р Вітаўт Кіпель — выпускнік беларускай гімназіі імя Я. Купалы ў Рэгенсбургу, доктар мінералогіі Лёвенскага каталіцкага ўніверсітэта, доўгачасовы выканаўчы дырэктар Даследчага цэнтра навукі і тэхналогіі Нью-Ёркскай публічнай бібліятэкі. У 1975 годзе д-р Кіпель быў узнагароджаны медалём Паняволеных народаў Эйзенхаўэра.
З 1982 году д-р Кіпель займае пасаду старшыні адной з найбольш уплывовых беларускіх навуковых ўстаноў замежжа — Беларускага інстытута навукі і мастацтва ў Нью-Ёрку.
Дзякуючы непамернай адданасці справе беларускага руха ўва эміграцыі, д-р Кіпель быў заступнікам старшыні Саюза беларусаў Бельгіі, стваральнікам і дырэктарам беларускіх фестываляў у Нью-Джэрсі, выкладаў у беларускай школе ў Брукліне, а таксама на працягу 1960–1980-х гадоў стала супрацоўнічаў з беларускай рэдакцыяй «Радыё Свабода».
Д-р Кіпель гэтаксама вядомы як лідар беларускага рэспубліканскага руху ЗША. У 1972–1982 гг. ён займаў пасаду старшыні Федэрацыі беларускіх рэспубліканскіх клубаў, а ў 1974 годзе быў абраны на старшыню Рэспубліканскай федэрацыі штата Нью-Джэрсі. У 1978–1982 гадах д-р Кіпель быў старшынём Этнічнай рады штата Нью-Джэрсі.
Сярод найбольш грунтоўных акадэмічных унёскаў д-ра Кіпеля з’яўляецца праца «Беларусы ў ЗША», выдадзеная па-беларуску ў 1993 годзе і па-англійску ў 1999 годзе. Дзякуючы гэтай кнізе, д-ра Кіпеля можна па-сапраўднаму лічыць бацькам навуковага беларускага эміграцыязнаўства. 600-странічная праца дагэтуль застаецца каштоўнай крыніцай ведаў аб гісторыі беларускай справы ў ЗША.
З моманту заснавання ЕГУ у 1992 годзе ступень Ганаровага доктара была нададзена такім выбітным дзеячам культуры, палітыкі і мастацтваў, як айцец Аляксандр Надсан, Алесь Разанаў, Кшыштаф Зануссі, праф. Сяргей Аверынцаў, д-р Джонатан Фэнтан, д-р Ханс-Герт Пёттэрынг, праф. Альгірдас Бразаўскас і іншыя.