Найбольш актыўныя слухачы курсаў падзяліліся сваімі ўражаннямі аб вывучэнні літоўскай мовы ва ўмовах глабальнага сацыяльнага дыстанцыянавання і самаізаляцыі.
Наталля Мяшкова, выпускніца ЕГУ 2009 года, кантэнт-менеджар кампаніі Yandex
«Літоўскую мову я пачала вывучаць падчас навучання ў ЕГУ, але, на жаль, з часам яна стала забывацца. Таму калі з’явіліся моўныя курсы для студэнтаў і супрацоўнікаў універсітэта, я без ваганняў запісалася, каб падцягнуць і паглыбіць свае веды. Бо Вільня вельмі блізка. Тут жывуць мае сябры, тут бібліятэкі, архівы, крамы, кавярні. І калі прыязджаеш у любімы горад, хочацца быць тут сваёй, а разуменне і камунікацыя на літоўскай мове дапамагаюць пачувацца больш упэўнена і камфортна. Да таго ж веданне замежных моў дапамагае больш цаніць і любіць сваю родную.
Сёлета з-за пандэміі паступова заняткі перайшлі ў анлайн-фармат. Гэта быў цікавы досвед. З аднаго боку, плюс у тым, што такая форма дазволіла працягваць навучанне ў складаны час самаізаляцыі, але усё-такі жывых зносін з калегамі і выкладчыкам не заменіць ні што.
Хацелася б падзякаваць нашаму выкладчыку Юрасю Внуковічу. На занятках апроч вывучэння лексікі і граматыкі літоўскай мовы мы таксама гулялі ў анлайн-гульню “Барбара Радзівіл”, спявалі традыцыйныя і сучасныя літоўскія песні, глядзелі фільмы пра падарожжы літоўскай нацыянальнай экспедыцыі па Беларусі. Часта заняткі выходзілі за рамкі вывучэння толькі мовы – у нас бывалі цікавыя размовы пра падабенства і адрознасць культуры беларусаў і літоўцаў, пра нашу агульную гістарычную спадчыну Вялікага княства Літоўскага. Вельмі спадзяюся, што і ў наступным годзе ў нас будзе магчымасць далей вывучаць літоўскую мову ўжо на больш высокім узроўні».
Марыя Савушкіна, магістр паліталогіі (ЕГУ, 2008 год), ІТ-маркетолаг, спецыяліст па камунікацыі і PR
«Літоўская мова не толькі адна з самых складаных у свеце. Яна вельмі блізкая да беларускай. На занятках увесь час даведваешся нешта новае. Вельмі роднае і блізкае. Бо культура, назвы, словы ў беларусаў і літоўцаў вельмі падобныя і розныя адначасова. З-за гэтага вывучэнне мовы ўзбагачае рознасцю і новымі кантэкстамі. Тым больш, што Літва побач і хутка можна будзе зноў паехаць і пачуць жывое маўленне, папрактыкавацца з літоўскімі сябрамі і калегамі.
Сістэматычнае вывучэнне мовы, як і ў любой іншай справе, прыносіць вынік. Можна хацець, гарэць, але калі няма сістэмы, заняткаў, штотыднёвай працы і хатніх заданняў, – не будзе і выніку. Таму два разы на тыдзень, плюс хатнія заданні, плюс самастойная праца, ці проста прагляд відэа на літоўскай, у рэшце рэшт даюць плён. Я разумею больш, кажу смялей, чытаю з ахвотай.
Асабіста для мяне ў дыстанцыйным навучанні адны плюсы. Па-першае, падчас майго навучання ў ЕГУ частка курсаў ужо была ў дыстанцыйным фармаце. І яны былі не менш інтэнсіўныя і цікавыя, чым аўдыторныя заняткі. Тут тое ж самае. Калі мы перайшлі ў Zoom, мне стала больш камфортна займацца. Дома пад рукой слоўнікі і пошук у Google. Таксама не трэба ехаць – а гэта прыкладна 1 гадзіна эканоміі часу. Інструменты дазваляюць настаўніку дзяліцца правільнымі адказамі і наглядна рабіць практыкаванні. Супер!
Я б вельмі хацела працягнуць заняткі ў наступным годзе. Падручнік па якім мы «рухаемся» наперад вельмі прагрэсіўны, хацелася б завяршыць урокі па ім. З задавальненнем далучуся да групы, якая падоўжыць навучанне ці ў аўдыторным, ці ў дыстанцыйным фармаце!»
