Павел Няхаеў, лектар Дэпартаменту сацыяльных навук
«Чаму я вырашыў вывучаць літоўскую мову?»
Я лічу, што беларусам трэба ведаць мовы суседзяў, тым больш, калі бываеш у іх не толькі турыстам. Штогод я па некалькі тыдняў праводжу ў Вільні – і так ужо трынаццаты год. Але гэта інтэнсіўныя працоўныя паездкі, таму па-за бытавымі дыялогамі ў крамах ці кавярнях магчымасці практыкаваць мову няма. Я спрабаваў вывучаць літоўскую, чытаючы кнігі, якія добра ведаю на іншых мовах, ці са слоўнікам разбіраў артыкулы па цікавых мне тэмах – таму пэўны слоўнікавы запас ужо меў. Але без ведаў граматыкі гэтага недастаткова. На жаль, я ніколі не трапляў на курсы, што ладзіліся ў ЕГУ. Таму гэтыя заняткі ў Мінску сталі выдатнай магчымасцю заняцца літоўскай мовай грунтоўна.
«Што далі мне курсы літоўскай мовы, арганізаваныя для студэнтаў і супрацоўнікаў ЕГУ?»
Гэта магчымасць сапраўды сістэмнага і рэгулярнага вывучэння мовы – ты не сам насам са слоўнікам і тэкстамі, а ў камунікацыі з людзьмі, сярод якіх шмат калег. А самае каштоўнае ў тым, што мы не проста працуем па падручніку – наш выдатны выкладчык, Юрась Унуковіч, ператварае кожны занятак у міні-лекцыю пра паралелі паміж літоўскай і беларускай мовамі, культурамі ды фальклёрам. Так, акрамя сухіх ведаў граматыкі ды лексікі, мы атрымліваем шмат самых разнастайных дадатковых ведаў – і пра Літву, і пра Беларусь.
«Ці планую надалей працягнуць вывучэнне літоўскай мовы?»
Спадзяюся, што восенню курсы працягнуцца, але ў любым выпадку, цяпер будзе прасцей займацца ды практыкавацца самастойна.
Юрый Стаюнічаў, дацэнт Дэпартамента сацыяльных навук
«Чаму я вырашыў вывучаць літоўскую мову?»
Імкненне вывучаць літоўскую мову было ад пачатку пераезда ЕГУ ў Вільню. Тады даводзілася праводзіць у суседняе сталіцы амаль па тыдню штомесяц. Вывучыў некалькі словаў для прывітання ды падзякі. У той жа час праводзіліся летнія школы, але патрапіць туды не атрымоўвалася.
Час ішоў. Гадоў таму мо пяць (ці болей) я пачуў у адной з лекцый сусветна вядомага філосафа Аляксандра Пяцігорскага пра тое, што літоўская мова лічыцца ці не самаю архаічнаю (найбольш захаванаю) у свеце, але і найбольш складанаю. Пачуў, задумаўся з павагаю да нашае супольнае мінуўшчыны і вырашыў шукаць нагоды для наведвання моўных курсаў.
А тут раптам і пашчасціла: пры размове з калегаю Паўлам Няхаевым даведаўся аб адкрыцці курсаў літоўскае мовы ў Менску. Узрадаваўся і вельмі добрым словам Паўла аб выкладчыку азначаных курсаў. Вырашыў запісацца і наведваць.
«Што далі мне курсы літоўскай мовы, арганізаваныя для студэнтаў і супрацоўнікаў ЕГУ?»
Ад пачатку ў мяне склалася вельмі добрае ўражанне ад творчае атмасферы на занятках. Мы не толькі вучылі новыя словы, разбіралі граматыку, але і шмат іншага даведаліся пра мову нашых суседзяў: пра блізказць да нашае мовы, культуры, гісторыі, пра паходжанне словаў, шмат чаго новага адкрывалі для сябе слухаючы музыку, гледзячы фільмы, чытаючы вершы на літоўскае мове. І ўсё гэта дязкуючы добра распрацаванае праграме нашага выкладчыка сп. Юрася Унуковіча. На кожным занятку адчуваеш сабе нібы ў сяброўскім атачэнні, – сярод добрых сяброў і аднадумцаў.
«Ці планую надалей працягнуць вывучэнне літоўскай мовы?»
Вельмі спадзяюся, што курсы працягнуцца ў наступным вучэбным годзе і я атрымаю магчымасць працягнуць працэс вывучэння літоўскае мовы на новым узроўні.